خفّ من نوع العنقيّة

على الصباح و مع طلوع النهار جات في بالي الأفكار و قلت نعمل دورة في الفايسبوك ، و ندخل للصفحات نعمل طلة على "الكومونتارات" و كيف كملت قلت يلعن بو باعث "الكونكسيون" .

واحد داخل يكفر في الخلق على بعضو و لاخر يقولو صدقت صدقت ، ناقص كان يهبطلو "شيشمة " " احم احم " .

بعد ، أحداث نهار الجمعة الفارط إلي قامت على كوميك ، فإنني نرى إلي من حقي ، نخرج نتظاهر ، باش يعملوا جزء جديد من "الكابتن ماجد" و جزء ثاني ل"داي الشجاع  " .
نرجعوا لتالي شوية ، و يزينا مالركاكة والبلادة ، نثبت على الثورة قامت على التشغيل و الحرية و الكرامة ، لكن اليوم نرى إلى الثورة بفضل الراكبين الجدد  ولات ثورة تكفير وتكبير وتصغير و لحية و سواك .
يا تونسي ، يلي خارج تعيط ، باش تسكر قناة و طموحك إمارة تونستان ، ما تحشمش على روحك خارج تتكلم توا :
 وينك كيف إلي شعرو بالجال نهار 14 جانفي يناضل ؟
 وينك وقت إلي بن علي ينحي في الخمار من فوق راس أختك ؟

 شبيك سكت وقت إلي تمشي تصلي يشدوك تاكل  الكفوف من نوع "داودي" و الخفّ من نوع "العنقيّة" ؟

كم أنت لول ، تونس ما هاش إمارة تونستان ، فلا ارضاع كبير ، أو ختان فتيات في تونس  يا رجعي .
كان جاء الإسلام لحية ، راهو ماركس أمير المؤمنين ، و راني أنا خليفة ، لكن الإسلام ايتيقا و مباديء و أخلاق و "المسلم من سلم الناس من لسانه و يده "
كيفاش ، مالا تكفر في نسمة بلسانك ، وترمي في الحجر على البوليس بيديك ؟

غدوة ، مسيرة سلمية مرخصة من وزارة الداخلية ، موش من عند "رب العالمين كيف ما كتبتو  نتوما " إضغط هنا .
فما في تونس ، إنتخابات المجلس التأسيسي على قريب و مهما عملتو أنا و برشة كيفي باش نخليوكم ترتعو وحدكم ، و مبعد نتلهاو بيكم ، نتصور الصحراء التونسية تهزكم الكل .
سلام على شعبنا وانها لثورةٌ حتى النصر .

إلي يحب يضحك إنزل هنا ويشوف سيري كرهبة من إمارة تونستان .