شبيك تاعب ؟ : و الله نهار كامل نقرى ...

قام في الصباح على صوت التليفون ، غسل وجهو ، و لبس حوايجو و ركّح شعرو بالجّال و دخل للكوجينة . قهوة الصباح في عقلو شربها و بالطبيعة كعبة الكايك و كاس "JUS" معاها . مازال عليه بكري على وقت الكار ياخي حل الإنترنت و شاف الأخبار الجديدة حول السياسة و البورصة و خاصةً غرامو الأخبار العالمية . 

جا وقت   الكار ، خرج يلقاها تستنى فيه ، طلع و بقى حاير ما بين بلاصة بحذا الشباك ، و إلا بحذا مريومة قطّوسة الحومة ، أخيراً قعد وحدو بحذا الشباك ، و حط الكيت و بقى يسمع في الفن عالصباح رايض مرتاح ، وصل للمحطة متاعو "الباساج" ، و هبط باش ياخو المترو الكاط . طلع كيف كيف المترو فارغ ، لقى تلاثة و إلا أربعة في المترو كل حد لاهي في روحو ، جبد يراجع في الدرس إللي قراها البارح حتى لين وصل للمركب الجامعي . هبط ، و دخل لل [Buvette ] ، خذا " كعبة كرواسان " و ديراكت ، تناقش مع زميلو في درس البارح ودخلوا لثنين يقراو ، القسم هادئ و الطلبة ساكتين ، جاو إمخّر شوية لكن الأستاذ تفهّم الوضعية و دخّلهم . شاركوا في الدرس ، و تعدات الحصة فيسع فيسع خفيفة و الوقت يجري . خرجوا ، خرج سي صاحبنا و ديراكت مشى لقاعة المراجعة ، يطالع في كتاب متع [Albert Camus] 

هذا هو الطالب التونسي ، لا بل بالأحرى هذا حلمو.

نرجعو للواقع ، قام سي فلان ، على تليفون من عند مريم ، قالتلو " ازرب معادش بكري " ، قام يجري ترمى تحت السبالة عمل الجال ، و خرج يجري وراء الكار ، طلع يلقاها كيف حكة السردينة و النفس مقطوع ، هبط موش عارف كيفاش ، و طلع في المترو ، يلقاه معبي ، تقول الشعب الكل في نفس المترو ، وصل بعد ساعة للفاك ، يلهث دخل ديراكت للبيفات ، خذا باكو دخان و قهوة و شد بلاصتو في الساحة ، قعد 4 سوايع و قلق قام فطر و رجع قعد مرة أخرى مع شلة أخرى و تعدى النهار و السيد يحكي و يهر ما سكتش ، من بنات ، كورة ، سياسة ,تروميز  .... كل ماهو موش قراية و روح في الليل في نفس حالة الصباح ، دخل تاعب للدار مسكين بعد نهار معبي قراية كيف ما قال لأمو و دخل لبيتو حل [ Facebook ] و [Skype ] و تعدات الليلة ، ورقد ومن غدوة كيف كيف .

قربت الإمتحانات و بدات الغصرات و اطبع هاذ ي و نقّل هذاكا و لِم الكور و السيريات و إقرى ليل و نهار و جاب سبعة و طاح كونترول و جاء في السخانة يعدي و " الله غالب " شكراً على المحاولة ، نلتقي في سبتمبر القادم " قالتلو الإدرة .

هذا السيد ، هو أنا و إنت و كل واحد يتطلفح يجي تقريبا كل يوم بش  ما يدخلش يقرى و عادي يعمل ساعتين تعب بين الكيران و المتروات و يتعب و يخلط تقول كان بايت يصب في دالّة و عادي ...

يا ولدي لواش عليك , موش كان تدخل تقرى خير ...

هيا مالة كوراج الناس الكل و نشالله بالنجاح و يزي فيه البركة راهو بعد الدياسات ما يبقاولك كان تلاثة جمعات و توفى السوماستر لولى ...

بلادي وإن جارت على عزيزة

تونس دولة تونسية : لغتها التونسي ، و علمها تونسي ونشيدها تونسي و غرامها تونسي ، حلالها وحرامها تونسي ، مشمومها تونسي و مشومها تونسي ، و فنها تونسي وعفنها تونسي وكفنها تونسي : إلي يتولد فيها تونسي ولي يتدفن فيهاوسلاطتها تونسية و حلوتها فليّو وكارها ديمة روتار و سراقها كثار و عملوا العار : تونسي ديمة صار ما صار ! و جاري الذي ينسنس عليّ و زميلي الّي عالغلطة يستنّى فيّ و جزّار الحومة الّي يغشّ فيّ و عرفي الّي ديما يخرنن عليّ ... و قدّ ما تعمل فيّ تونس نحبّها هي هيواللبن إلي شطرو ماء تونسي ، والبقلاوة بالكاكوية تونسية ، وميات غرام قلوب فوقها شنغوما كلوروفيل ، وفي البلفيدير تحجير الفيل ، والشرش شلوق براني في النشرة الجوية ، والحضرة والمزاودية ، والعودة المدرسية ....آه ، وريحة الملوخية والطابونة واللبلابي ....وحماة الحمى معششة فيك وفيا ، في الغربة من المطار تبدى ساقي تاكل فيا ، مكفن المارس لاجار لا في الديوانة يفيقوا بيا ، بعد ما عالفيزا عملوا فيا: ينحيولنا كل شي ، وكل شي يتبدل وتقعد الجنسية : تونسية !والميمة بعد طريحة نباش القبور تغلفك بالفيكس والزهر تونسية ، و مهبة العيد والتصاور والبامبلوني ، ومماتي ما أحلى ريحتها معترقة بلكولونيا تونسية ، والقلة في الطهورات ، والقلة في اللمة في الزنازات ، وللامة في المنامات ، والعروي والحكايات ، ولبخورات وركيض الغشاشر في الفروحات ، و-"يزي عيب عواشر " ، وربي في دعاء الخير حاضر ، ويكب سعدك بعدها يعيش ولدي ، ..... الحايك والفوطة والسفساري ، تريكو فضيلة وترتيل الأنداري ... تونسي أنا متع راي أونو و فرانس دو وجغام في الوطنية ، تونسي أنا متع الرشة زهر ونسري في القهيوة العربي : تونسية !البريكة تونسيّة ، و البرّاق يرتّل في القرآن قبل شقّان الفطر تونسي ، و قصع الكسكسي في سيدي محرز تونسيّة ، و الغلفة بالفليّو و " الطبيب آش يفهم منّه" تونسيّة ،و "ديقاج" تونسيّة ،و الغنا الملتزم في الجامعة تونسي ، و الوصيف بيّاع التكوة في بياصة باب سويقة تونسي ، و عشويّات الصفصاف تونسيّة ، و الخسارة في الكورة تونسيّة ،و الفطاير تونسيّة، و الجبّة تونسيّة ، و الشاشيّة تونسيّة، و قفص الكانالو تونسي ،و بوك كي يضربك و من بعد يقلّك إيجا تعشّى ، و الضحك الّي يشدّك كي واحد يطيح قدّامك ، و الفوسكة تونسيّة ، و الدوران في الحياصة تونسي ، و صبّان الماء في النهج باش العزيز يرجع تونسي ، و طاجين الملسوقة بونارين تونسي ، و المشلوش في ليالي الشتاء الباردة تونسي ، و ربع الكابوسان الّي نتقاسموه تونسي ، و جمع سيدي بلحن تونسيّة ، و القصّان على البرامج التلفزيّة كي يقولو لك " نكتفي بهذا القدر" تونسي ، و قصّان الضو على غفلة تونسي ، و قشور الدلاع في البحر تونسيّة ، و الغشّ تونسي و الغشّة تونسيّة، و الدمعة السخونة لأقلّ حاجة زادة تونسيّة ، تونس في قلبي و في عينيّ ، تونس ياسمينة بلديّة و قناويّة مرساويّة و وشمة بربريّة لاهي أروبية و لاهي خوانجية

الصورة : عمناول في جانفي الستة متع الصباح في آخر الأوطوروت إلي يدخل لتونس من جهة المنڨالة ...

آخر فرصة للتدارك يا شعب تونس

مانيش باش ننتخب النهضة و لا عمري باش ننتخبها خاطرني، على عكس برشة توانسة

[ إللي للاسف عندهم ذاكرة ضعيفة ]، ما نسيتش كيفاش رفضوا نواب النهضة إللي عندهم الاغلبية تمرير قانون منع عودة التجمعيين   ...مانسيتش إللي صار في سفارة أمريكا و أبو عياض اللي جابولو نقاب و هربوه من جامع الفتح .بأوامر واعتراف صريح من وزير الداخلية علي العريض ما نسيتش  الاغتيالات اللي سبحان الله سبحان الله ما مست كان جماعة اليسار وعمرها لا مست شوية عاليمين !! ما نسيتش شكري بلعيد و نهار 6 فيفري 2013. ما نسيتش دموع بناتو إللي إتيتمو خاطر بوهم كان راجل يقول كلمة الحق وما يخافش ... ما نسيتش إغتيال محمد الابراهمي ...  ما نسيتش تسريب وثيقة اغتيالو من وزارة الداخلية في عهد النهضة وعلي العريض..

 وخاصة وخاصة ما نسيتش الغنوشي في الفيديو المسرّب متاع الأمن و الجيش ماهمش مضمونين!! ما نسيتش فيديو الافعى عبد الفتاح مورو مع المتخلف وجدي غنيم حول استراتيجية النهضة على المدى البعيد لدغمجة الابناء...ما نسيتش شيوخ بول البعير أصحاب ثقافة النقاب و جهاد النكاح والتحريض على القتل اللي استقبلهم اللوز والغنوشي في تشريفات المطار واستقبلهم المرزوقي في مقر السيادة التونسية واللي عملو تونس دار مقام في عهد النهضة و دمغجولنا أولادنا و بناتنا بأفكار عدائية.. 

ما نسيتش الاف الشباب في عمر الورد اللي سيبوا القراية  و امهاتهم وهاجروا للحرب الارهابية ضد الشعب السوري البريئ... ما نسيتش أيمّة النهضة في الجوامع اللي تفرق بين التوانسة هذا مسلم و هذا كافر و تنادي بقتل المناضلين علنًا و بالاسماء و اللي لا واحد فيهم تشد و تحاسب ليومنا هذا!! ما نسيتش جنودنا الصغار في عمر الزهور اللي نكّلوا بيهم أولاد أبو عياض في رمضان و مع شقان الفطر بالضبط و والديهم ألي تحرموا منهم إلى أبد الأبدين..

 و ما نسيتش زادة كيفاه في عهد النهضة رموز من التجمع ورجال بن علي تم تعيينهم في مناصب حكومية بداية من حكومة الجبالي ...ما نسيتش الــ 30 ألف نهضاوي الذين تم حشاوهم في الادارة التونسية وتحميل الميزانية اكثر من طاقتها من جيب المواطن الزوالي في حين بقي الزواولة من المعطلين من ابناء الشعب ينتظرون وعود البحيري بــ 400 الف موطن شغل..ما نسيتش الــ 15 الف مليار المفقودة من ميزانية الدولة والتي لم نرى ردا رسميا من حكومة النهضة حولها..وما نسيتش وزراء بن علي الكل طلع صابونهم نظيف وتم اطلاق سراح اغلبهم في عهد النهضة و كأًن شيئاً لم يكن وعملوا احزاب وأمورهم واضحة و في كل مرة يحكولنا على الثورة و أهداف الثورة ألي عملها الزوالي المغبون..

ما نسيتش روابط حماية الثورة النهضاوية التي نكلت بمعاريضي النهضة وسحلت تونسي حتى الموت ويتمت ابناءه.. ما نسيتش فضائح المجلس التاسيسي وقرار تعويض النهضاويين من فلوس الشعب الجيعان بمئات المليارات والذي تمت المصادقة عليه في منتصف الليل... ما نسيتش كيفاش تونس اصبحت مخزنا يعج بالاسلحة والعمليات الارهابية ..ما نسيتش حتى شيئ من هذا ومن غير هذا من مصائب عاشتها تونس في ع سنوات من حكم الاخوان الذين كذبوا وقدموا برامج وهمية واصبح المعدم منهم والفقير يقود أفخر السيارات ويسكن قصور وفيلات في اشهر قليلة فحين يجوع الزوالي التونسي ويعجز عن دفع معاليم علاجه وقفة يومه...هذا الي ما نسيتوش ..أما مازال أكثر من هذا مصائب وهموم يعجز العقل على استحضارها في نفس اللحظات...

حاجة وحدة كيف بش تحطوا النهضة في اللحظة هاذيكا تذكروا جنودنا و الشعامبي و تذكروا الفيديو المسرب متع الغنوشي مع السليفية الجهادية و إختاروا مصير ولادكم , تحبوا تعيشوا لاباس و إلا تحبوا بناتكم جواري تجاهد بالنكاح و أولادكم موتى مذبوحين يتجاراو ورى الحوريات ! 

ما تقلقونيش بنبيحكم و برامجكم متع البص

بكلامكم الكاذب, بتحاليلكم المعفطة , ببرامجكم الزايفة , بوجوهكم الحرفة إنقرضوا !

ما عاد تعنيولي شيئ , لا لوغة مستقبل و لا لوغة مصير و لا متع العود ,  ما يجمعني بيكم شيئ و لا نتقاسموا في شيئ و ما عندي حتى مسؤويلية مشتركة مع حتى حد .

إنتخبوا , بايعو خليفة , أنصبوا المشانق , بيعوا ترابها لبلاد , زيدوها ثلالة لدزاير و ليبيا , ما يهمنيش في آرائكم التافهة .

سمعناكم تلاثة سنين لتالي و لليوم لا خدمتوا البطال و لا تداوى المجروح و لا خذا حقو الشهيد و لا شديتوا القناصة و لا نحيتوا الرشاوي و لا حسنتو الكياس و لا عطيتوا حقوق الناس , زعام كان تجيو كالحاس وقت الإنتخابات , لا يا سي الخرى مانيش مواطن مناسبات و مانيش من شعب متع مرة في القداش و مانيش هنا بش نتصور في عرس الجيران , هاذي بلادي قبل ما تكون بلادك أما يلعن بو الوقت إلي جابك .

كان جات الدنيا دنيا راهي الناس تفيق , بالسارق و العميل و تكوي يديها و صوابعها على الهم إلي عطات , إنتخاباتكم و برامجكم سدوا بيها و آش  شبعنا بالبص و الكذب و النفاق , سنين توا متربعين على ضهوراتنا و الزيادات و التاكسوات و الأتاوى و السما الكل مسيتوه , شخليتوا في الزوالي القليل غير العضم .

وفات المنامة يا تونسي يا متع ثورة و بن علي هرب , الطرابلسية مشاو , هاو جاك الوجه الصحيح متع الحكام العرب الكروش مليانة و اليدين فيها سبحة هاك راكش مع العزايز تحكم و وقت الإنتخابات يطلوا عليك في الحفرة و يقولولك كانك حي إيجا صوت و كان مت لا يكون فيك !

سدوا بيها و تايجكم ماعمبالي بيها , تصرفوا و ما تقلقونيش بنبيحكم و برامجكم متع البص .