الثورة الفكرية

الواحد عندو مدة ، يحلل و يحاول يلقى تفسير لنتائج الإنتخابات إلي طلعت عندها جمعة و الناس فرحانة بالإنتصار و ناس  شدت طريق المعارضة إلي يا ليت كان الناس الكل تخلط عليها ، و هاو علاش :

يقولوا إلي اللوم بعد القضاء بدعة ، لكن لازمك يا تونسي ، تشد طريق المعارضة حتى للناس إلي عطيتهم صوتك ، ماهو وعدوك قبل الإنتخابات و حلولك في الجنة ذراع اليوم لازمك تكون من أول المطالبين بحقوقك تجاه إللى تاجروا بدم الشهيد و جراو عالكرسي بجميع الطرق . 

الشعب التونسي ، لازمو ينحي ثقافة الحزب الواحد ، و ثقافة الستاد إلي ذكرتها في مدونة سابقا ، و يتعدى من مرحلة الدفاع عن الأحزاب و كأنها وطنو المصغر إلى الدفاع عن مصلحة تونس ، إلي كان جات الدنيا دنيا رانا الكل قبل ما نحنيو بالأزرق رانا خممنا في الزوالي و الشهيد و المزمر على روحو ، و قبل ما تركب عالأحدث و تناقش في الأربعة نساء ، و تحد من  حقوق المرأة ، لازم تكون مواطن يحب يتقدم و يحب بلادو تكون مثال في الديمقراطية والمواطنة و هاذي حاجات تغيب على جميع المتخونجين ، و يمكن هنا انو نعطي زوز أمثلة و الفاهم يفهم : 
الصين ، أقوى القوى الصناعية 77% من شعبها بين ملحد و غير مؤمن بلإلاه الواحد .

و  أمريكيا إلي اكتشافها يعود إلى 1492 فقط ،  كيف رجالها خرجوا للحرب في أوروبا ، بقات نسائها تبني كيان الدولة .

إذاً  الكفار أو الملحدين ، إلي ترى في روحك خير منهم يلبسوا فيك ويوكلوا فيه و بماكيناتهم تقرا وتخدم باش تاكل الخبز . 
و، المرأة إلي ترى فيها عورة ، عملتلك بلاد تمشيك و تجيبك على كيفها و تحكم فيك وعينيك تغزر .

هذه ، الأمثلة ، عطيتها مش باش نقتديو بها ، لكن باش نوري لبرشة ناس إلي التقدم و التطور عمرو ما كان يجي بأنظمة القمعية الإسلامية ، و انو الدين مسألة شخصية لا تمت للسلطة بصلةٍ  كيف ما إيران المسكينة و أفغانستان و إلخ إلخ ...
يقول القايل ، نحنا مسلمين ، أي صحيح لكن شكون نحنا ؟   

احنا ، أولاد الشعب ، و ديننا الإسلام و لكن عمرنا ما كان اسلامنا متع جهاد و تكفير و تكسير خلايق و ماء الفرق .

تاريخياً و في عهد ما بعد الإستقلال ، جات موجة كبيرة من الهجرة إلى الخارج ، فما إلي مشى لأوروبا و رجع بالفكر الحداثي التنويري ، العقلاني و الشطر لاخر  إختار انو تكون بلدان الخليج وجهتو و رجعلنا بالفكر الضلامي ، فكر المدبية  و شيوخ الرجعية من سلفية و وهابية و الأغرب إلي البعض منهم سعى وراء تطبيق اللي عاشو في الخليج في تونس ، المتقدمة ، تونس الحرية ، تونس التعليم إلخ إلخ ، و هذا شيء ما يتسكتش عليه إذاً طيرنا علينا الجرابع بعيد على بلادنا و قمعنا كل من يحاول الإلتحاق بفكرهم الرجعي .

لكن و للأسف ، اليوم يرجعوا ، و من مفجري نزل و خوامجية إتحولو إلى وزراء و على قريب و مش مستبعد رؤساء ، إذاً يا ولد الشعب ، توا اللي صار صار الواحد كلا الكف و عرف اللي الجهل و الفقر ما يساندوش القوى اليسارية اللي تدافع عليهم لكن تساند الليبرالية اليمنية المتسترة وراء الدين اللي تعشيه ليلة الإنتخابات و تعيشوا للجوع باقي عمرو .
الحل  ، اليوم هو الأخذ عن الثورات الأخرى و من ثورة العياط و الصياح لازم تكون الثورة فكرية و التونسي و بحكم ثقافتو العالية أحسن لوغة يفهمها هي لوغة الشارع .

علاش الثورة الفكرية  ؟

خاطر لازم من واحد إلى أخر يتعدى الوعي و لازم الناس تتجادل و تتحاور و كيف ما كانوا 23 سنة ، يقولوا " حقو عدا الكورة لصاحبو  ما هوش متسلل " لازم اليوم ينحي ثقافة الكورة و الستاد و يقول " لازم ، بلادي تتقدم و مستوى الوعي يكون جماعي مش كان الأقليات " .
و باش نختم المدونة ، بكلمة برك عالطاير :
بن علي ، قال 300.000 موطن شغل باش يعمل ياخي الشعب زاد ثار عليه و شبعنا ضحك مالكذبة هاذي ، كيفاش كيف قالولك 590.000 موطن شغل ، بعتلهم صوتك زعمة هاذم اللي لابسين قناع الدين باش يعملوا المعجزات أو أن فيهم قداسة إلاهية ؟   

كيف ما قلت ، اللوم بعد القضاء بدعة ، و الواحد لازمو يحل عينيه و يناضل باش يبني المستقبل خير ما يجي نهار و نندمو على نهار نادينا فيه بالحرية و الديمقراطية اللي أخيب حاجة فيهم انو لازمك تسمع و تحترم رأي غيرك .