كل ما تاقف الزنقة بالهارب و الشعب من جهة و المعارضة من الجهة لخرة , يطلعولنا بالإرهاب و يرعبونا بالدمايات و الموتى و الإغتيالات .الشعامبي و الإرهاب ( جوكير ) الحكومة , هيّ تِخلى و هوما يخرّجوهم من القفص يخدموا بيهم خدمتهم و يتعدّاو كالشعرة من العجين الشعب يترعب , يتلهى في الموتى و ينسى هم الحكومة .
نتذكروا لكلنا فيلم برسيبوليس و كيفاش تم تقديم الحكم للنهضة في طبق من ذهب , هوما يحكيو على الإسلام و الشريعة و حماية الدين إلخ و فجأة ضربة جزاء يسدّدها الكبول متع نسمة في مرمى الناس أصحاب البرامج و الحديث عن الإقتصاد و الضروف الإجتماعية و من وقتها صارت النهضة في عيون الشعب ذلك الملاك الطاهر محرر البلاد من الكفرة و الماسونيين و الملحديين و تحمي الحماة و الدين .
شعبنا العزيز ...
يا مغفل ! ماذا رأيت من المعارضة كفرًا , حتى تكفرها ؟ فقط النهضة كانت تكفّر معارضيها من الإعلاميين و الفنانيين و السياسيين و تحلّل دمائهم في منابرٍ صارت مدنسةً بأشباه الأيمة من طحانة النهضة .
في ما يخصّ , حرق الجوامع , بالله نعاود السؤال : آش ريتو منّا كفر بش تكفرونا و تقولو حرقنا الجوامع ؟ و لماذا ؟ و لمصلحة من نحرقوا في الجوامع ؟
ماهو تقولو هددفنا الكرسي .. باهي ... ياخي كيف نحرقو الجوامع و إنت نعرفوك تغار على دينك زعمة بمنطق
النصّابة في السوق بش تجي تشري سلعتنا و إلا بش تمشي لواحد يحميلك في دينك على حدّ كلامو ؟؟
و غير هذا , يا أخي نحنا مسلمين من أولنا و فرانسا إحتلتنا قريب الميات سنة و جاء بعدها الزعيم بورقيبة و بن علي إلّي
تكفرو فيهم و ما وليناش لا مسيح كي الفرانسيس و لا كفار و ماسونيين كيف ما برقيبة و الزين .....
و في ما يخص إعتصام باردو , نوجه رسالتي للمعارضة الحاوية في هالبلاد زعمة قوة من النهضة أو بهامة منكم كيف الزوالي و المهمش و الفقير من الملاسيين يخرج ينادي بالشرعية , هذاكا كان جات الدنيا دنيا راك توعيه و تفهمو و تناقش معاه و توريه أنو المسكين هو أكبر متضرر في حكمهم , هو غلات عليه العيشة , هو مات في البحر حارق , هو يبعثوه يجاهد في سوريا , هو يقتلوه كيف يروح بالعو , هو يرفلوه لولاني في العسكر , هو يهدو عليه للدار في سرقة و هو يعاملو فيه كالكلب و عافسين فيه .
و لكن العيب مش في النهضة كي شراتو بالفلوس , لو كان جاء واعي و فاهم اللعبة راهو بزق في وجه شاريه و قلو أنا نحب بلادي و نكره السياسة و ما نفهمهاش لكن نفهم الظلم و الفقر و بش نحاربكم خاتركم ما حربتوش داء حياتي .
يا معارضة , يا فاشلين , يا همامي نم يا حبيبي نم , يعطك و الله ب*م على بهامتك و السلمية متاعك , خايف لتقولها باش ما تتحسبش ضدك في الإنتخابات الجاية تي مانا عارفين سكوتكم شنية الكلكم هبطوا لباردو تعبيو في الأنصار الجدد و تبنيتو التحرك الشعبي و رديتوه متاعكم و عملتولو لجنة تنضيم منكم .
و يا سي الباجي , مطالب شبابنا عند حل الحكومة هو تشكيل حكومة من الشباب و تعيين خبراء للدستور لذا مش لازم تبعث وليداتك يمثلوك و يطيبولك عشاك خاتر القعدة الجاية متع غشاشر و سيادتك فهمتني ولاّ موش نديدنا .
أما النهضاوي المتفاني في السهر على تلميع صورة الحكومة و يدافع على شرعيتها نقلو :
يا أخي العزيز : محرزية شرات ال و إنت باكك بالفويت / ديلو عمل دار بمليار و نص و إنت شريت الفلفل بألفين / ولد بن سالمالخضار عمل تلفزة و إنت تاكل في شوكوتوم بستة ميا في القوايل عطشان / بوشلاكة ضارب مليار من عند الصين و إنت زادوك سبعة بالميا في فاتورة الضّو / الغنوشي شاري دار بمليار في حي الغزالة و إنت عايش طبشتر في سيقارو تحت الحيط ... هوما دارو العالم في الوتلة و إنت يهبطوك كلب تنبح في شارع الحبيب برقيبة مرّة شرعية , مرة إقصاء , مرة كفار , مرة مقدسات و إنت كالمغبون تتبنّن في فلوس الحرام و تنادي ضد روحك ... غدوة النهضة تمشي و لا يرحمك حد !! اليوم عيشوا بعشرة آلاف من عند النهضة و بندرولها غدوة يجي غيرها و يعفّسكم تحت صبّاتو وقتها ما تقولوش يا ليتنا كنا رجال خاتر بش تكون راجل في هالبلاد لازمك ترفض الطحين و للأسف أنتم تفتحون أفواهكم جوعى للمال غدا من أعطاك يزول و من سيحكمك يطيك البشّ*ل !
-------------------------------------------------------------------------------------------------
عذرا على الكلام البذيئ و لكنه أطيب للقرّاء من خطابات زيتون و اللوز و الغنوشي و الصحبي عتيق
