علاش ما تحلش مخك و تقرا وحدك ؟؟

الأرتيكل هذا بش نتناول فيه علاقة الشيوعية بالإلحاد خاتر خاصة في تونس عندنا ذكاء خارق يخلينا ما نقراو حتى كتاب لكن نجموا نطيحوا تصور إقتصادي كامل خاتر العطار قال :"الشيوعيين كفار" 

أول حاجة شنية هالشيوعية ؟ ؟

1)هي نظرية سياسية تلقى مصدرها في كتابات "كارل ماركس و انغلز" خاصة في بيان الحزب الشيوعي 1848، إللي أنتجوا التصور هذا كبديل سياسي للنظام الرأسمالي القائم على الملكية الخاصة لوسائل الانتاج.

2)الشيوعية مبنية على تنظيم اقتصادي لا مكان فيه للملكية الخاصة لوسائل الانتاج و الهدف متاعها توزيع عادل للخيرات بين البشر و القضاء على التفاوت الطبقي بينهم.

3)الشيوعية هي  النتيجة النهائية لنمو تاريخي للمجتمع الانساني من العبودية الى الاقطاعية الى الرأسمالية ..وهو تاريخ قائم على االتفاوت بين طبقتين "طبقة تملك وسائل الانتاج" و أخرى "لا تملك غير قوة العمل" ..و  يقترح ماركس الشيوعية حلاّ لمشكلة المساواة بين الناس و القضاء على المجتمعات الطبقية ..و ذلك لا يتم الا بثورة الطبقة الكادحة التي لا تملك غير جهدها اليومي ضد طبقة البذخ و الثراء الفاحش ..
نجموا نرميو المعنى هنا على مصر (أوده فوق السطوح // سرايا الست الهانم و الباشا يا لفوق لفوق،  يا مع الدجاج)

توا تفاهمنا في الشيوعية،  أما آش معناها إلحاد ؟؟ 

هو عدم اعتقاد المرء في وجود أي قوة خارقة مهما كان نوعها و شكلها : أصنام الوثنيين أو الاه التوحيديين .. ظهرت كلمة إلحاد عند الحضارة اليونانية في القرن الخامس قبل الميلاد .. و لا علاقة للالحاد بشيوعية ماركس التي لم تظهر الاّ في القرن التاسع عشر..

الذاكرة العربية زاخرة بتاريخ كامل في الالحاد العربي من "أبي جهل" و "أبي لهب" الى القرامطة وبعض الفلاسفة الذين نسبت اليهم تهمة الزنادقة خاتر كانو لا مسلمين و لا حتى يعبدو في هاك الأصنام متع اللات و العزة ..

ماركس ما تلهاش بالدين من جهة الالحاد أو الايمان و  مسألة وجود الاله أو عدمه عمرها لا تدخل عندو في خطّته الفكرية أو السياسية مباشرة، يعني مشكلة التصور "الشيوعي" للعالم هي تحديدا القضاء على التفاوت الطبقي و تحقيق المساواة بين الناس عن طريق اعادة توزيع الخيرات بينهم  توزيعا عادلا   .

أما عن مسألة التدين و الالحاد فيعتبرها ماركس "مسألة شخصية "لا علاقة لها  مباشرة  بالسياسة الكبرى للبنى الاقتصادية في المجتمع. 

أما هاو التخلبيزة هنا : أهم ما نخرجو بيه  من التصور الماركسي للدين هو اعتبار ماركس الدين نتاجا لبؤس اجتماعي تعيشه الطبقة الكادحة التي لم تجد من حلّ آخر لوضعيتها المادية البائسة غير الاعتقاد في عالم آخر بوسعه أن يكون أرحم و أجمل من الدولة الرأسمالية التي تحولت الى جهاز قمع للبشر و سحق لامكانيات العيش العادل و الكريم بينهم .و بدلا عن الثورة من أجل تغيير العالم يكتفي المتدين  بالاعتقاد في آخرة بعد الموت ..
لكن ماركس لم يحارب الدين و اكتفى بتنزيله ضمن ما يسميه بالايديولوجيا أي منظومة القيم و المعتقدات التي ينتجها مجتمع ما كانعكاس نفسي وقانوني وسياسي للبنى التحتية الاقتصادية و المادية الخاصة به.
الناس تحت حكم الكنيسة كانو فقراء موتى بالشر و لكن كل شهر لازم يدفعوا حق صكوك الغفران المسيحية و راضين بفقرهم البائس و خشية من وحشية الحكم متع الكنيسة كانو ساكتين،  جواعى و راضين بالفقر و كأنهم ولدوا ليكونوا فقراء غصبا عنهم.

توا بش نمشي لما أبعد،  لينين إللي قاد الإتحاد السوفياتي بكلو بنفس النظام توجه بخطاب خاص للأقلية المسلمة عندو،  هذا مقطع منو بش ننساو لوغة ضد الدين و درا شنوة :

"أيها المسلمون بروسيا و سيبيريا و تركستان ..يا من هدم القياصرة مساجدهم و عبث الطغاة بمعتقداتهم ..ان معتقداتكم و عاداتكم و مؤسساتكم القومية و الثقافية صارت اليوم حرّة مقدسة..نظّموا حياتكم القومية بكامل الحرية ..فهي حق لكم، و اعلموا أن الثورة العظيمة و سوفياتات العمال و الجنود و الفلاحين تحمي حقوقكم و حقوق كل شعوب روسيا.."
و يضيف " ..لقد أُعيدت الآثار و الكتب الاسلامية  المقدسة التي نهبتها القيصرية الى المساجد ..و قد تمّ تسليم القرآن الكريم المعروف بقرآن عثمان في احتفال مهيب الى المجلس الاسلامي في بيتروغراد في 25 ديسمبر 1917 ، و قد أُعلن يوم الجمعة ، ، يوم الاحتفال الديني بالنسبة للمسلمين ، يوم الاجازة الرسمية في كل آسيا الوسطى."

يا سيدي بلد يتبنى تصور شيوعي إجتماعيا و إقتصاديا،  همو الأول هو الفقر،  المساواة،  العدالة...  و إللي يحب يقارن الشيوعية بالإلحاد نحب نسإلو :
" الفيل أطول و إلا الزرافة أسرع "
آش جاب تصور إقتصادي،  لدين كامل ؟

منين ترا فيه الربط العقلاني؟  الشيوعية طيحت حكم الكنيسة الديني،  ياخي كيف طاح الإتحاد السوفياتي البلدان الرأس مالية حطت كل طاقتها بش تشوهها و لقات أنجع طريقة هي أنك تخرجها في صورة إلحاد و تسربها عند الثقافات الكل بش الشعب ينفرها و يعيش تحت صباط صاحب السيڨار...