ما لقيتش عنوان

السلام يا جماعة

نشالله بعد ،ما صارت المشاكل الكل على الغنوشي تتصلح الأمور ،وريونا العصا السحرية  متاعكم توا 

،و بربي يا جماعة توا نحكيو في شوية حلول يزينا الوعي ماناش بش نحلموا بيه في تونس خاطر شعبنا و للأسف فيه العديد من العناصر المتخلفة إلي تنجم بمبلغ صغير تتباع كرامتهم و تشري حبهم للوطن و الأسعار تبدى من ثلاثين دينار فما فوق ، ولكن هنا نقولوا إلي ثلة قليلة من الشعب مهاش بش تخلينا نحكمو على شعب كبير ، وشباب واعي وجاب الثورة ، وتوا نوليو ننتقلو لحماية الثورة ، وكيفاش هذا وكيف نحمي ثورة ؟ والإجابة هنا جات لجنة متكونة من 28 منظمة واحزاب بو دورو  تحمي هكاكة ملحيط ما نصبها حد بش تحمينا ،وقاعدة تعطل في سير الأحداث

 وكذلك في نقطة هذي نمر إلى الحديث عن الثورة ، ومطالبها توا أنا مع حل المجلسين النواب والمستشارين وبقية المطالب لكن ، النظام البرلماني يشد الحكم فيه رئيس الوزراء والرئيس يكون عندو دور شرفي يعني فرايجي،و هذا البرلمان يشكل أعضاؤو،الحزب إلي لم أكثر أصوات في الإنتخابات البرلمانية ،وهذا النظام نلقاوه في البلدان ألي حكمها ملكي وكذلك توجد بلدان حكمها جمهوري و عندها  نظام برلماني ، و منها  إيطاليا وإسرائيل ،نعم إسرائيل ، ومن سمات هذا النظام أنه في حالة فشل هذه التجربة وفي صورة إستقالة  رئيس الحكومه معناها لازم استقالة كل الوزراء اللى فى الحكومه ،و هذا نظام سامحوني في الكلمة "أحول" ثم انه الشعب التونسي الأن في حاجة ماسة للثقة في الحكومة و الشيء هذا معناش خاطر ماعندي إنا شخصياً ثقة في حتى حزب وحتى حد بكلها تسعى إلى مطلبها الخاصة و تجري ورى الكرسي الذهبي ، أنا نرى إلي توا لازم نعملوا حوار وطني مفتوح نسمعو من الجميع ونحاولو نلبيو مطالب الشعب المعقولة ، وقبل مانبداو نصلحو مالفوق لازمنا نصلحو ماللوطة ""والمقصود مش كيما فكر البعض ""  يعني نصلحو أنفسنا و نرتقيو بذاتنا إلى درجة من الوعي الإجتماعي و السياسي أعلى من ما هي عليه خاطر والمصيبة إلي فما عباد اليوم قارية ومهاش فاهمة شنية مجلس تأسيسي ونظام برلماني و حتى شيء نقلهم عيب عليكم

 وحاجة أخرى إلي يرى كلب يكسر و إلا ، يسرق و إلا يخرب الرجاء منكم التصدي له ، و ردعه و الحاكم راهو يدافع على نفسه ولى وأنا ريت البارح عباد في العاصمة عشية كاملة حيوانات ، تضرب في الحاكم هكاكة وزادة كنت من الناس إلي تعداو عادي والحاكم مكلمهمش  وذلك خاطر عباد واعية وعرفة ألي يضربوا راهم ضد مصلحة تونس   ، خليو يا ناس الحاكم يخدم على روحو ،صحيح فيهم الفاسدين و لكن مش مهبول يكر على جماعة و راهو شعبنا باهي و واعي و ما ينقصه شيء على الشعوب الاخرى ورنا قادرين على الأفضل و لكن فينا زادة هوايش يستغلو في الوضع بش يعملوا أعمال مشينة في حق الثورة  

ثم بربي نحنا الشعب التونسي نحاولو نلقاو حل للبطالة ياخي ومن نهار غدوة عندنا كم وكمية هامة من البطالة زادمة علينا بعد ما تم تدمير البلماريوم والمحلات ألي كانت توكل الخبز لعديد العائلات ،إذاً بربي يزينا مالمطالب الإجتماعية ، و هيا نبني الغد الأفضل لتونس و نصلحوا إلي بقايا التجمع كسرتو ومازلت تكسر فيه و نحاولو نقضيو على أزمة المفاهيم ، وأي كلمة مافهمتهاش لوج وافهمها بش منبقاوش نعانيو مالجهل

و في هذا الإطار متع الأزمات عندنا زادة أزمة البهامة نوصلوا لحاجة أنا شخصياً وقفتلي مخي   ألا وهي  ""رموز الماسونية في تونس "" بربي من هذا الأحمق صاحب الفكرة ؟   نحب نقلوا ومع كل احتراماتي لشخصو اننا لسنا في وضع تفدليك توا لازم الجدية برى يا أخي شوف حل لنفسك والله يشفيك على قريب !

يا جماعة سامحوني طولت لحديث عليكم المرة هاذي ولكن الله غالب مؤشرات القرب من بر الأمان بعدت شوية ، لذا ما تسمعوش كلام الإتحاد العام التونسي للشغل ولا كلام المعارضين ،  نفخوهم وبراو أقراو واخدموا غدوة انهضوا بإقتصاد بلادكم و القصبة تناديكم للوقوف مساندةً لمطالب التوانسة هناك ولكن زيدو خمو في البرلمان و المشاكل ألي بش يحوطنا فيها من فراغ سياسي و خلافات ماناش في حاجة ليها و أكهو انستو وأنتم احرار و إلي بش يقول عن ماسونية موجودة و بريكة و صمصة وطابع جبن مثلث نقلو بربي لا تحط تعليق و برى أخطاني راني موش ناقصك !!!

والسلام