(راسي وجعني ، بربي احنا وين ؟ (16/04/2011

عسلامة يا جماعة أول حاجة مبروك الثورة ، ونشالله ديمة فرحانين أما نحب نحكي شوية ليوم على إلي نراو فيه وربي يستر 

بربي سامحوني إنا مانيش سياسي ومانفهمش فيها كيما شطر  إلي شادين لبلاد توا زادة ، منفهم في شي ولكن عندي من الذكاء مايخلني نحس ببلادي داخلة في حيط وحيط أحرش من نوعو ،نحب نقول حاجة صغيرة :

يا اطارات كملوا اعملوا إضرابات ، وطالبوا بزيادات ،  وقفوا إقتصاد لبلاد ، زيدوا جوعو لعباد ، تعشاو نتوما وعيشوا لباقي في جوع ،هزو لبلاد لثنية بلا رجوع ،راكم نتوما جبتوا الثورة ،ومش لبطال ، طالبو بحقوقكم توا لكل مع بعضو ،كن فيكون، وتهناو تونس و الإذاعة معاكم لاهين يوريو فالفقر والمزرية و ناسين إلي  فلوس اشعب عند أكا السراق ، وينهم 48 إسم ،وين مشاو ؟لتوى لتشدو ؟

يزني من تصاور الهم و العيشة تحت السفر ، جيبلي لخرين حاسبهم  ، وبربي توا لهيتونا بالفقر والدعارة، تجريو مسكرين ماخور قفصة وسوسة وقيراون ، بربي في غياب الأمن ومع إرغبة المكبوتة عنا في تونس ، ماتخافوش على بناتنا ،زعمة البطال إلي ملقيتلوش إنت حل ومافهمتوش يا قاري ،تحبوا كي تتعدى بنتك يفهم ويقول أخطاني ؟؟،

علاش هكا هازينا للهاوية ، تحبونا نوليو كي مصر على 10 بنات تلقى 6 مغتصبينهم ؟ بربي القضية كانت بطالة ، و حقوق تعبير  ،وخاصةً كرامة ، اليوم كي حققناهم "ولو شوف وشوف" علاش مش كيما يد وحدة يوم 14 جانفي نكملو يد وحدة ونبنيو تونس ، تونس إلي ولات كي مصب إزبلة ، تونس إلي من 10 متع اليل تشد داركم لاتتبركا ، تونس إلي ولات بلد المليون نصاب في العاصمة ، تقلي "خليه ياكل الخبز "، نقولك" اعملوا وين ياكلوا هذاك وجه لبلاد "، تونس إلي مواردها بسيطة ، فلاحة و سياحة خاصةً، نقلك إلي لفلاحة مشات خاطر المطر عاملة إضراب زاد عام السنا ، وإسياحة أناهي إلي بش تجيك والبلاد داخلة في حيت كي دار العرس ،على شنوا على الأمن المستتب وإلا على الجو الربعي الهاديء ؟،

وينك يا طالب ويا تلميذ  يلي قلت "خبز وما وبن علي لا " دوروك فالحياصة و وليت تعيط " لا دراسة ولا معلومة حتى تسقط الحكومة" ؟  بربي توا المطالب عندها شهر مفتوحة وقدام الولاية صف بالمئات كل يوم ، عداوشي في التلفزة عبد لباولو مطلب ؟، ريتشي الدولة تعاون فالمحتاجين ؟ريتشي الأمن رجع؟

علاش لحكومة تغلط بش تلزك تتكلم وتصلح ؟ حكايت 19 والي تجمعي ،شنوا زعمة مافاقوش بيهم ؟أهوكة زعمة زعمة المواطن يحكم ،هنا نحيناهم؟ لا

نقلكم هذوكم ألعاب يعملوا فيهم يوهم فيك بألي   إنت تحكم ولكن هوما يلزوك تحكي فلي يساعدهم ويبدلوه حسب مطلبك إلي هيا مسطرة ملأول،و قال شنوا سمعنا كلامك !!

حاجة أخرى وأخيرة ، توا على كبرها تونس بش نزيدو نتقسمو ؟قبل كنا أنا مكشخ وإنت ساحلي وهذاك يحب البقلاوة إلخ إلخ... ولينا تعدينا للجهويات و الحمد لألله،تجاوزناها وتوا ولينا وصلنا لمرحلة إنت يساري وإن يميني ، هذاك خوانجي هذاك علماني ، هذا يصلح هاذاك لا ، الحزب لفلان باهي لاخر رئيس خايب ، علاش حكى توا وصلنا نحن للإنتخابات ؟ تقولي " من توا نعرف بش مبعد نبدى عمل رأي " إي نعم من حقك ولكن إحترم غيرك يعيشك "فلا الاخوان ارهابيون ولا العلمانين كفار " و "من شاء فليؤمن ومن شاء فاليكفر "

خلينا داخل الإطار ، ونخمو شوية وين اخرتها معاهم ، وشنية وضع بلادنا ،  رجعلي لأأمن واشهاري مش وقت زيادتها توا ، توا وقت خدمة جيب لفلوس بش تخ لفلوس ، معناش ميزاب يهبط علينا فالارزاق وكما يقول اكة لهارب لكبير صلح كان في هل أية "وقل اعملوا فسير ألله عملكم "  

الكلام طال ولحديث مازال ،   ماندخلش فالديتاي ، خاطر يحبلنا شهور  ولكن فما حاجة قاعدة تتلعب ، نشالله نكون  غالط ونكون نهلوس وحدي وإلي لبلاد أمورها 6/12 

،فيقوا شوية وماتنساوش إلي رانا توانسة لكلنا توانسة وتحيا الحرية 

بقلم سامي "مواطن التونسي وما ادراك " وشكراً