كابوس ‏و ‏تعدى ‏... ‏

الحال سخون و الطقس عامل بلعاني ... فوق ال 40 سخانة .

نص نهار في غرغور القايلة بش ما نقولوش في زك الڨايلة و الناس زادمين من كل بلاصة ...

في الأخبار كالعادة يحكيو على الحيوانات و تكاثرها في البلطيق و الدنيا ماكلة بعضها وسط عياط و سبان و ڨاز و ماطراك ...

ناس لا عمرها الحكومة راتهم و لا عندها عليهم معلومات، شباب مالجهات الكل ملثمين و زادمين بقهرة كبيرة على موت عزيز عليهم بالكورونا و صاحبهم ناكوه بالرش في سليانة و زميلهم في الباك مات غارق و بنت حومتهم هزها الواد و صحابهم تقلبت بيهم كار في عين دراهم و غيرهم مللي قلوبهم كحالت و غزرتهم للدنيا كحلة ... ما يراو كان الموت و إلا بلاد أحلى !!

الداخلية تعزز و الشعب مازال واقف و الأفواج زادمة ... ولاد الحوم المقهورة ، و البطالة ماكلتهم و المستقبل كي سواد الليل يستنى فيهم و هوما واعين ...

ماضي ساعة الداخلية ما عادش قادرة بالموارد الكل تاقف لهالسيول الجارفة ... الناس ما عادش يحوك فيها ... ساعة ضرب و عنف و ڨاز و وفات الذخيرة و الناس باقي ما علا بالها ... 

باردو ترعش و شطر النواب بدا يخمم بش يزعك و يفصع ... 

مخلوف و العفاس و سمارة و الطحانة الكبار بدات تتسرسب ... نواب قلب تونس لبسو علم تونس و خرجوا زعمة زعمة يتظاهروا ... حد لا يعرف وجووهم و حد لا معبرهم !!

عبير في لحظة بهامة قالت هات نركب و نخرج للمتظاهرين ... ناكت مشطة أخرى و هربت تجري !!

النهضة من مونبليزير تبعث في التوجيهات و تطلب في الإستغاثة خاتر الشباب كلا الأخظر و اليابس و دخلولهم للمقر و بداو يكسسروا و بدا المعبد الأزرق يتطايح ...

في قرطاج القصر فازع و الناس موش فاهمة المصيبة ... 

جاء زمان و إنقلب السحر على الساحر ... وينك يا القصبة شنية أحوالك ؟؟ 

المشيشي و شوية من الحاشية شد طريق المطار ... لقاهم في الباب مسكرين الدخول و الخروج ... اليوم نهار الحساب و وين الهربة . تحصرت كي الضبع يا ولد القحبة إنت و الجماعة إللي معاك و حتى سيدك الشيخ ما عندو ما يعملك ...

وسط الزحمة و في مقر الإذاعة يطلع واحد يخطب ... و يمسح بجد بوهم القع و يعطي تفصيل لبرنامج بديل ... فيه تأميم و تسخير و مصادرة و حجر سفر و سجن و إيقافات و محاكمات شعبية بالجملة .... ( عباد ساهرة ليالي تخطط و تهندس في ثورة أعظم من البولشيفية و منظمة كي حراك 26 جويلية في كوبا) ...

الغنوشي في خلعة و شورط يطلب في السماح على ركايبو و وراه نسيبو و الهاروني و ديلو و العريض و حتى الجبالي جاء ...

ماليوم وفات الحلمة و وفى معاها سرك عمار و إيجا نبنيو بلاد جديدة !!

تعليق المديونية و تسهيلات لبعث المشاريع الحرة و حلفاء جدد للدولة و تقنين للإقتصاد الموازي ... هاذم جيل جديد يحبوا بلاد ما خير ... لا يوقفهم لا خطاب تافه و لا لغة " سوف نعمل على ..." هاذم نار جهنم الموڨدة و الشواطن تقرا عندهم و تدوبل ....

هاذم جيل قمعتوه و فيبالكم جهلتوه و سكتوه و هو حي !!

اليوم فاقوا من تحت التراب و صنعوا ثورة جديدة العالم يبهت فيها !!

الثورة هاذي لاهي ثورة الياسمين و لا ثورة الحبق هاذي ثورة الجواعى العطاشى المكرزين المقموعين المفلڨطين ... هاذي ثورة رجع لزبي حقي و برا نيك أمك ...

 هاذي ثورة لا تستعرف لا بالأخلاق و لا بالإيتيقا ... هاذي ثورة شباب كره رب حياتو منكم و من بهامتكم ...

رجعلي بلادي و برا نيك 100 من أمك ....

ٱنا هكا و يضرب ال alarme و نقوم بش نمشي نخدم ... نعمل سيڨارو و قهوة نيسكافي و نلعن النهار أللي خلقت فيه في هالحفرة ...  نخرج نلقى روحي بكمامة و مانيش مزرق ... نقصد ربي للخدمة و نروح نسكر لين تكحال الدنيا و يوفى الشرب و نتخمد نرقد و نبات ندعي بش نخرج من زك أم هالحفرة و نرتاح !!