تونس ‏: ‏حديقة ‏الحيوانات ‏

كيما تقول نجاة الصغيرة " كل الكلام قلناه و ٱدينا زي ما إحنا ...." 

هاذم يحكمو في تونس ... و الناس تمشي تنتخب ، زعمة تعطي في أصواتها بش تحلم بتونس ما خير ... تف !!

#الخوانجية : مجربينهم 10 سنين و الموت أرحم مالعيشة معاهم ... عماونا بالرش ، قتلونا بالڨاز ، جابولنا الإرهاب ، باعونا لقطر ، جوعونا في كروشنا ، عراو شبابنا في الكياس ، ساهموا في قتل البراهمي و بالعيد و لطفي نڨض ، دڨدڨوا الدينار التونسي ، قتلو الرضع و رماوهم في كراضن ، البوليسية متاعهم قتلو عمر غارق و غيرهم تحت التعذيب و سيبوا الٱلاف مالمجرمين تحت راية القضاء مضمون ... ضعفوا قدرة المواطن الشرائية ، قتلو 16 ألف في الكورونا و عاشوا هوما و قتلونا و فقنا إللي  " عاش في تونس من خانها "

#النداء و #عبير و #ٱفاق و #مشتقاتهم :

ظواهر صوتية ... الفم الحارك ، الولاء التام لرؤوس الأموال ، إقتراحات بالية ، برامج أقتصادية أقرب للخيال من الواقع ، صراعات داخلية بش ياكلوا بايهم ، كرز و ما يشبهولناش ، خطاباتهم نوفمبرية و شعاراتهم و معاركهم تافهة و ما تعنيناش كمواطنين. إمتداد لفكر رجعي بالنافطالين ، يحربط بش يرجع يحكم تحت درابو سيد الأسياد بوهم بورڨيبة .

#قلب_تونس :

ههههه ، حاشم بش نحكي عليه كحزب سياسي  ، هو مثال لقوة الفلوس وين تنجم توصل ... مثال يحتذا به في التحيل على التوانسة و إستغلال جهلهم ... تدخل بيرحم خليل في عمل جمعياتي ، و من بعد تولليو أصوات إنتخابية و تجي ثاني حزب في البلاد . تتجبد دوسياتك ، توللي تهبط سروالك و تتحالف مع الخوانجية و بطبيعتك حتى كان تجيب 90% تبقى فاشل و مافيوزي و خماس عند ... ( كيما قال زميمهم نبيل المقروني ).

#إئتلاف_البهامة :

مزيج يقزز بين البهامة و التخونيج و التبوريب ... حاجة مقرفة و متعفنة و منبطحة ... برشة ثورجية و لوغة مضروبة متع واحد يخاطب في فانات كلاي بي بي جي... لا برنامج و لا تصورات و لا خطاب ثابت ، المهم سيدنا الشيخ راضي علينا و يحيا الإسلام يا سااااحبي . خليط متعفن لكل ماهو نظرية مؤامرة و الإسلام في خطر و فرانسا ناكتنا في الملح و البترول و الشب ... ٱما عندهم مفاتل تلقيح باهين  هوما جربوهم ...

#التيار_البرتقالي :

يستحي الواحد أنو يتطاول على كاريار مناضل كبير كيف محمد عبو ، ٱما لازم نتفقوا أنو الثورة هي قطيعة راديكالية بين نظام قديم ساقط و نظام جديد صاعد ... هاذي عبو ما فهمهاش كيفو كي غيرو مالمناضلين القدم ... نظافة اليد موش مزية ، البرنامج موجود و الذكاء في التحالفات غايب كي رجولية الصحبي صمارة...  حزب يخلبز و كل مرة في يسبح على تيار جديد ، المهم لتالي و ليس لقدام و بش يلقى روحو بحذا الجبهة الشعبية في الإنتخابات الجاية .

#المستقلين  : نم ليكم و للي ينتخبوا فيكم ، ما نجم نزيد حتى شيئ ... أصوات بلا فايدة.

#قيس_سعيد : أستاذ جامعي ، نظيف  عمرو لا سرق طباشير و عمرو لا طبع بزايد أوراق في المطبعة متع الفاك ... قد ما جاتو فرص بش يسرق و ينهب و يستولي عالمال العام إلا أنو بقى نظيف .... كهو ما لقيتش فكرة سياسية ، أو برنامج ننقدو عليه ... هذا ٱش فما ، إنسان يذكرني بواحد قاري زوز جرايد و متفرج شوية في الجزيرة عام 2000 ، جات الثورة ولا لاهي شوية بالسياسة و ها وينو معانا لا ننسوه ...

المشيشي : الحقيقة قد ما حاولت نتواضع ، لكن الحقيقة بش نقول تفوه و نتعدى ... ما يستحقش حتى كلمتين سبان .

💩 هاذوما في 2021 ، محتلين المشهد السياسي و الtrend اليومي و يحكمو في شباب تونس إللي ما يقومش ينتخب خاتر يحب يهج لطاليا ... هاذوما عايشين بالحصانة و يخدمو بمعدل نص ساعة في النهار ، هاذوما تخلص معلوم التلفزة في فاتورة الضو بش تلقاهم يسبوا في بعضهم و يتلاطخو بالبونية و المشطة تحت قبة مجلس النواب و ينيكولك في وجه بلادك لين طاح لل B minus ...

هاذوما ردوك في العالم مصنف جاي من أكبر دولة تصدر في الإرهاب ... هاذوما خلاو واحد يدخل بكلاشينكوف على سياح في سوسة ، هاذوما خلاو ناس ترتع بالكرطوش في متحف الحظارة في باردو ، هاذوما شقوا فطرهم مع الٱذان وقت جنودنا تتذبح في الجبل ... هاذوما فرڨعوا بتوصياتهم كار متع أمن رئاسي في محمد الخامس على بعد درج مالداخلية ... هاذوما بوليسيتهم تغتصب و تضرب و تعري و توقف و تسيب كيما تحب و النقابة تحميهم ...

نلخصوها ... هاذوما بلاصتهم في الحبس . 

"وإذا كانت كلماتي لا تبلغ فهمك فدعها إلى فجر ٱخر" جبران خليل جبران 

© سامي أدكينس 🖕