تونس في كلمتين : بلاد البؤس

تحذير هام : الموضوع متع اليوم ما ينجم يتحكى كان بالكلام البذيئ لكن بش نحاول نشد روحي.

تونس.... 

أو بالأحرى سجني المؤقت،  و كلمة سجن نستعملوها كيف تبدى غصبا عنك موجود في بلاصة و ما تنجمش تخرج لبرة، و حقوقك تاقف في ماكلة و شرب و "لارية" خفافي.
تونس هكا بالضبط مع ما تيسر من الموبقات بش الواحد يصبر روحو كيما بالضبط "المرهوجة" عند المرابيط.

أولا، و قبل ما يبدى النفاخ متع "شبابنا ضايع" ،  "هذا كلام ناس فاشلة"،" هذا كلام ناس غير واعية"،  حبيت نأكد على أنني مانيش فاشل و مانيش شاب أصلا و عندي شهادة جامعية (bac +5) و إللي قاريه كتب في حياتي يعبي مكتبة.

مشكلتي الأولى مع تونس في عبادها، و على راسهم الجيل الخرائي متع ناس قبل إللي كلماتهم المفضلة "بلادنا بلاد خير،  نفطرو زيت و خبز،  الشباب متع توا بهايم" ... هاذم لازم ينقرصو خاتر جاو في زمان تونس فيها 5 ملاين و خارجة من إستعمار و قاعدة تتبنى،  فبحيث مستوى سادسة إبتدائي قادر يكون مدير أو إطار بشركة.

ثاني فئة، هوما الجيل متاعي بنسبة كبيرة منو يعاني من داء البهامة عافانا و عافاكم الله و إللي تتجسد في أننو مجرد كسرونة في سيري كباقي أندادو :"فايسبوك ،تلفزة ،ردائة ،تصوحيب ،شيخة، نوم، قهاوي، 4 تصاور و سرقة عالفايسبوك ".

الفئة الثالثة هوما، عامة الشعب أي هاذوكم متع الترانات و المترو، المكشبرين نهار و ليل، إللي يسكروا و ينتخبوا النهضة، إللي يدزوا في المتروات، إللي يخدم الثمنية و العشرة يشد القهوة، إللي في إدارة يقلك أرجع غدوة... إلخ إلخ.

*  *  *

بخلاف العباد، إللي بصراحة (يدهم)، فما الوضع العام. مثلا البطالة كأزمة أولى و إللي تشمل 900،000 شاب تونسي منهم آنا. و المشكلة موش في البطالة فقط، هي مشكلة في سياسة الدولة في إيجاد حلول. خاتر حتى كان عندك فكرة في هالبلاد بش تعمل مشروع تلقى حل من ثنين : يا ترهن داركم، يا يغورولك على فكرتك و إنت تغزر... و لا تقلي innorpi و لا bts خاتر متعدي بيهم الزوز و نعرف فاش نحكي.

الأزمة الثانية في القوانين، مثلا ما تنجمش تشري حاجة مالبرة بالأنترنات خاتر خايفين على خروج العملة، من جهة أخرى الحشية الكبرى في أنك حتى بش تدخل عملة صعبة و تخدم حر مع العالم تلقى نفس الحواجز...

من مؤشرات التعاسة و الكآبة في هالبلاد القحبة، هو أنو الشباب في عمر النشاط و الأفكار و الإنتاج، شادد القهاوي (خاتر مضطرين) و زيد مالفوق يلعب في الرامي و الشكبة و الأتعس الplanet-win  (كان مانيش غالط).

*  *  * 

آنا يا رسول الله طموحاتي في الحياة ما تجيش في ربع حق مكتسب في الخارج،  و الأتعس أنني في ال35 كان خريت فيه و حشيتو بش نلقى روحي كاري و نخلص في قرض الكرهبة و العرس و ولدي في روضة ب200 دينار و نخدم كي البهيم و ناكل في المرمز و العجة...

بلاد كاملة عايشة في الروج، بالسلف و حتى الدولة مادة يديها و تطلب و موش بش نحكي على الوضع السياسي خاتر بصراحة (يدهم حتى هوما قبل يدين الشعب) و ماني نستنى منهم في شيئ و نشالله ديما صامطينو فينا فلاوطو... آما توا يقول القايل شنية الحل؟

الحلول موجودة :
- مرا عزوزة و عايشة في بلاد العكري، تصطادها في الصيف في وتيل...  تعمل معاها القباحة لين تحفظ إسمك و مبعد تهج.
- شقق و إلا بالانصي و تمشي تشوف طريقك، تخدم إللي يجي لين تركح أوراقك بأي طريقة.
- كوردة كانك جبان و حالتك منيكة و كي وجودك كي بلاش للبشرية.
- الطحين و بوس اليدين و التلحيس و الرشاوي و سي فلان و صاحب papa و بربي سامحني بعثني ليك فلان (عصبة ليك و ليه).

ختاما، خاتر طيقرت و كرزت : هذا بيت شعر حفضخولي واحد يذكروا بالخير (حرق عندو 7 سنين...) في ال collège :

تونس يا بلادي، يا أنيك البلدان *** يا خضراء، يدك في الزبي حارق للطليان.

على أمل أننو الأرتيكل الجاي نهبطوا من لمبادوزا، حبيت نعلمكم أنني بالحق نلوج في هجرة غير شرعية...  لذا كان عندكم خيط نورونا.