حب

إيجا نمشيو بعيد و ما داير بينا كان الخضار و البحر تحت سماء زرقة و إتكى على صدري و أحكيلي على صغرك و صحابك و عيشتك و الدنيا لكل.  أحكيلي و ما تسكتش خلي الطبيعة مجرد ديكور و  إنت مخ الهدرة و نجم السهرة و الوقت الكل.

إيجا نسمعو الموزيكة ، نحطلك شوية jazz و نتعداو للكلاسيك و تسمعني غناية blues و بعد تقلي هيا نحفلو الجو و تبدا ال salsa و نشطحوا نشطحوا لين نتعبو و نتكاو في القع متع مسرح قديم في قلب Vienne و نبقاو نتفرجوا في الزينة و الألوان و الفن.

إيجا ندوروا في قلب المدينة العربي و ناقفو عند بياع نشريو شركة بالياسمين و نتعداو نعملو فنجان قهوة عربي بنين و نبقاو نحكيو على الثقافة و العرب و أمجاد دولة الأندلس و نبقى نعشق في عينيك و نسمع في رأيك و في مخي شاهي نخطف دقيقة،  لحظة نشالله حتى حلمة نعيشها في مخي و نبوسك و نذوب في شفايفك و ياقف الوقت و ياقف الموضوع و نضيع بين السكات و دقات قلوبنا كيف تتلم.

إيجا،  نمشيو في قلب مدينة مليانة عباد،  New York و إلا Vegas وين حد لا يتلهى بحد،  و نتفرجوا في الناس ماشية جاية من قهوة فيها terrasse،  نترشفوا في زوز jus باردين تحت شمس قوية و بكل تفاهة نقلك :"ريت عينيا في الشمس محلاهم عسل"،  و إنت بعناد تتلفني و تقلي:"عينيا خير" و نضحك عليك و نشدو يدين بعضنا و نلم الكلام الكل في كلمة و نقلك :"نحبك" على غفلة و وجهك يحمار و خدوذك تعمل لون الورد و يديك ترعش و تدخل بعضك و نعنقك بش نخبيك و تبقى في حضني لحظات مبعد تقلي :"جعت" و نكملو نضحكو...

إيجا نمشيو نتفرجوا في مسرحية،  من عهد الأدب الأنڨليزي القديم، reprise متع شكسبير يحكي عالحب و إلا مسرحية تحكي عالعشق الممنوع بسيناريو Garcia Marquez "الحب في زمن الكوليرا" و نخرجو و الثلج يصب و نبقاو نحكيو عالكتب و نتعاركو على شكون أحسن كاتب و شكون أحسن أديب و نتعاركو لين تتعدى ساعة و نحنا نعملو في سواڨر واقفين في بركون يطل على شوارع فارغة في قلب باريس ليلة رأس عام و نقلك يزينا مالحديث و هيا نمشيو لل restaurant نتعشاو ، في جو بارد قدام شمعتين مع جو طلياني و Pavarotti و André Rieu عاملين ال fond و نسرح في الزين إللي قدامي و تقلي محلاك لحيتك طويلة و نبقاو ليلة كاملة ساهرين مع الفن و الجو و الشراب لقديم و الوسكي بش ندفاو و نروحو للوتيل سكارى نتطايحو و نتضاربو بالثلج و نجريو في الكياس و تقلي تعبت و نهزك في يديا لباب ال chambre و نطلع نسيت المفتاح و نطرشقو بالضحك و نبقاو في القع نرتاحو و بعد نهبط نجيبو و ندخلو و نحيلك حوايجك و نحطك في الفرش و نستوي الريدو بش نصبحوا راقدين من غدوة و نجي بجمبك و نتكى و نكمل دوزة قبل النوم و سيڨارو للشطر و نرقد و نكمل نحلم ببقية العمر معاك و نتبسم بالسرقة خاتر في مخي قلت لروحي :" توا عرفت علاش جيت للدنيا و تخلقت "