باش خرجنا من الثورة ؟ : عبارة " أقعد نازل "

من مدة ، الأحداث ولات تجري ياسر و معادش خالط ، نلم في تدوينة وحدة الحكاية الكل قلت نعمل حويجة شطر لفة نشبع بيها الضياف في ( البلوغ  ) ...

هيا ، يا سيدي راكش على روحي ، ناوي نعدي راس العام عويقل ، مع الفاميليا و المدام فإذا به في نشرة الثمنية للأخبار يطلعلنا سيادة الرئيس حامي البلاد من كل الحروب و صاحب الصلاحيات المتعددة ، بخطاب فاق الرائع بشوية ، و أحسن مقطع هو التكوليف و التدخل في شؤننا الخاصة  و تذكيرنا بأن الإحتفال برأس السنة الإدارية موش مقبول و موش متاعنا .

سيادة الرئيس ، راهو التلفزة موش من عاداتنا و الميكروفون و الكاميرا و البث عبر الأقمار الإصطناعية الكفرة موش من تقاليدنا الإسلامية ، ثم أنو البرنوس إلي لابسو ، ماهوش من عاداتنا هذاكا متع بربر مهمش مسلمين .

أما بعد عندي سؤال محيرني :

" كيف إنت ، موش تابعك الإحتفال بالسنة الإدارية ، لواش جاي في تاريخ ( 6 صفر 1433 ) تحكيلنا على حاجات موش متاعنا و موش مقبولة ؟؟ ياخي كذبنا الكذبة و صدقناها ؟؟ بالرسمي حكاية ال41% جدت علينا  ؟؟

عزيزي ، المواطن مبروك عليك العام الجديد و نشالله تحصل عديد التغيرات في كل المجالات على خاطر  ، حتى شيء ماهو ماشي ...

نشالله ، الطالب يولي ( يحلم ) باش يخدم كيف يكمل يقرى موش بعد سنين .

نشالله ، يجي نهار و نفرحو بالكار و المترو معادش كيف حكك السردينة و المصبرات أحياناً 

نشالله ، المشكلة الأساسية للبلاد ( مشكلة العنس و النقاب  ) ، تتحل و الشكر يرجع لله و للخريجي و فلسفته جدااااا .

سامحوني باش ، نهرب عالموضوع ، هات  نتذكروا تصويرة ، للزعيم الحبيب  بورقيبة في مشيتو لأمريكيا و الإستقبال التاريخي إلي صارلو ، نعم هذيكا تصويرة بلادي و مثثلها ألف حساب يتقرى لتونس العظيمة  .

لكن اليوم هنا نلحسو للياباني ( وزاكي / يازاكي ) ، بالله أرجع حل المعمل .

و للقطري و الخليجي بلاش فيزا  ( إيجا ، بالله عدي الصيف عندنا ، اشري شوية جواري ، ما عليك كان تقول " هاذي نبيها " ) .

و هانا يعملولنا في دستور يعمل 66 كيف  لا يجرم التطبيع و شكراً باعث الثورة بعيني نهار 14 جانفي ريتو في مكدونالدس شادد الصف على "دوبل شيز برغر " و يناضل من أجلو .

  حسيت إلي بلادي قيمتها تخربشت شوية جرة شوية عباد و برشة اعتصامات و عديد الأطراف الدخيلة على بلادنا و المشكل إلي ( حاملي الجنسية الإنقليزية ، سامحوني موش لندن ، مجرد زلة لسان ) ، ولاد بلدنا ، حالينلهم البيبان .

اختم ، هذا الأرتيكل بكليمة حول تاريخ تونس : 

( إلى كل ، من يعتقد أن تونس مرت عليها عديد الحضارات ، نقلو  لا لا قرايتك غالطة ، كذبنا عليك باش نردوك من الكفار ، الحقيقة هي إلي تونس جات مع إنتشار الإسلام و أنك معادش باش تربط تونس كان بالخلافة و الشرع و العادات الإسلامية و الإشارات الربانية و هكذا نبدء في بناء تونس الغد ، من غير ما نتعلمو من أخطاء الماضي و فرد مرة نمحو الماضي و فسخ و ابني من جديد )

و نورمال ....